【二人成行旅行團】南丫島住宿玩樂篇

Holimood21/02/2017010K views

之前為大家帶黎【二人成行露營+玩樂攻略】，睇黎大家都一樣，唔係咁易約到成村人去玩。

所以小編決定陸續有黎，今次為大家帶黎南丫島住宿玩樂篇！

南丫島絕對係留係香港輕鬆一下既好地方，島上景色怡人，而且生活節奏較市區慢，而且呢到有不少外籍人士聚居，街上有好多提供歐陸及亞洲料理的小餐館、酒吧及手工藝精品店，散發住濃濃的異國情調。

東南亞小島風情渡假屋

南丫島較長洲寧靜，渡假屋都有更多唔同既style可以選擇。呢間近碼頭既渡假屋，景觀一流，

而且裝修風格都係走溫馨簡單路線，但簡單唔等如冇格調！

而且房間既設備都好齊全，堪稱係渡假屋界既星級酒店！

南丫島這間粉紅色主題既房間就一直由門口「粉」到露台，再由露台「粉」到去廁所再去返廳。真的粉紅得很徹底。
牆身、床單、梳妝檯、床頭櫃、窗簾、以至漱口用的杯都是粉紅色的。間房絕對寬敞，約埋個friend黎促膝把酒就可以傾通宵啦

房間小裝飾都絕對精緻，真係好有Feel啊～～～

至於兩個人去南丫島有咩玩？小編就有啲提議啦，無論係情侶兩個人咁去，定係兩個friend咁去，都得！

今次小編為大家選擇了一條接近零難度的南丫島行山路線:中央南丫島遠足徑

靚境任你睇，無論是行山初哥定專業行山友，都可以行吓山放鬆吓!

路線: ① 榕樹灣 ➡ ② 風采發電站 ➡ ③ 洪聖爺灣 ➡ ④南丫島家樂徑 ➡ ⑤ 蘆鬚城灣村 ➡ ⑥ 索罟灣

南丫島漁民文化村位於南丫島的索罟灣養魚區，由退休的南丫島漁民所經營。

大家可以在面積約二千平方米的漁排上，親身體驗漁民生活，認識香港原居漁民傳統文化和捕魚業發展歷程。

遊客可親身參與起桅升帆、體驗垂釣、浮排釣魚、起大網捕魚，學習醃製咸魚、繩結技術、編織漁網等！
南丫島的索罟灣是天然的避風港，以往這裡是漁村，到現在您偶爾還可以看到漁夫在艇上撒網捕魚。