迎接陽光與海灘！租冷氣南非營，全包任玩水上活動！

呢啲天氣有少少熱，間唔中有少少涼，最啱親親大自然。話說以前PND玩行山好多年，露營堅係要揹60L背囊，帶埋爐、Gas、食物、衫、水、營等等攀山涉水，真係諗起都覺得好重！而家想潮住做文青去露營？朋友唔推介俾PND，我都唔知原來而家帶基本裝備就可以輕輕鬆鬆露營架喇！

「浪高長岸 Long Coast Seasports」位於大嶼山長沙下村，係一個有13間營嘅營區，又係一個水上活動中心！呢度訂一晚營，就可以任玩水上設施！

講到最潮營地，當然唔少得PND鐘意嘅南非營！

亮點南非營，4個大營就會share公共洗手間(2間)同浴室(3間)。

營外更有大型彈床，大人任彈唔嬲，當然都要小心安全啦！

營外有BBQ爐，基本只帶日常用品同食物就可入住。

營內有電制、冷氣、防蚊網、床鋪等基本設施，鐘意乾淨嘅朋友都覺得幾乾淨，戶外嚟講係幾唔錯！

彈床前面仲有繩索滑行，好爽！

喺南非營放低行李後，就可以帶齊裝備出海大玩特玩水上活動喇！

沙灘仲設有兒童版彈床，會有網圍住，小朋友唔使驚彈彈吓墮地，咁就自然更安全啦！

設有lockers，潮友可以安心擺放私人物品！

救生衣、風帆、滑浪板等設備齊全。

埸地有香港最Top嘅菲籍教練駐場及教學，唔識慢慢學到識！

準備！長沙泳灘多數吹偏東風同西南風，浪潮唔算好勁，啱哂玩風帆、小型帆船、印第安獨木舟、衝浪，

仲有好啱初學者玩嘅淺灘衝浪板（PND呢啲唔驚跌嘅最啱玩）仲有近年勁hit嘅風箏滑水！

識滑浪嘅潮友一定可以喺長沙大展新手，呢度有多款花式滑浪板租借，非常方便！

唯一有少少美中不足之處就係日落方位較偏，想睇日落嘅潮友，大澳碼頭觀賞點應該會更佳。

搵夠一大班朋友、莊員上下全體或一家大細姨媽姑姐（隔離營成30人��），夜晚可以搞返個BBQ party！

場地提供嘅係西式可調式炭燒爐，可以將肉食放喺鐵架上面用明火直接燒，潮友可以帶定錫紙同煎Pan作生炒 / 煮麵用。

炭方面，如果喺埸地買2包炭或以上就會包埋開爐，唔使自己透爐透到躁底。

食物就可以喺東涌街市買定，營內雖然無雪櫃，但可以租雪種同冰箱保冷！

雖然埸地有大光燈設備，潮友都不妨帶備營燈，煮食同處理食材時會更方便！

半溶芝士棉花糖脆包、牛扒、胵翼、waffle、金菇肥牛卷、茄子、蕃茄、朱古力香蕉、菠蘿、海鮮都係PND嘅燒烤首選食材！

枝裝酒方面，如果自攜，場地可能會收取$40/枝的費用，想帶酒嘅潮友就唔好太明目張膽喇~！

潮友可以帶埋睡袋嚟邊瞓邊玩，夜晚玩吓camp fire、彈吓結他、玩吓light painting（記得帶腳架）、數吓星星（超多星星）玩吓card game都幾浪漫！

Re-U？營地見啦！

浪高長岸

確實地址：大嶼山長沙下村 29 號

參考收費：每個營 $2150（適合8-10人或以上）

水上設施可獨立租用

查詢電話：35680824

Whatsapp：54039901

（喺果度一次過可以睇哂營車同營仲有渡假屋，同訂埋）

營業時間： 星期一至五 10:00-日落；星期六、日及公眾假期 09:00-日落

點去： 由東涌市中心起步，搭新大嶼山巴士 11 號喺長沙下村站落車，向前行1分鐘落斜即到。

車程：約 20分鐘

的士收費：～$65-$75